အနုပညာရှင်အချို့၏ ဖေ့စ်ဘုတ်အကောင့်များကို ဖောက်ထွင်းသိမ်းပိုက်ယူလိုက်သည့် 9MC Hacker အဖွဲ့နှင့် အင်တာဗျူး

လက်ရှိအချိန်တွင် ရုပ်ရှင်အနုပညာရှင်များဖြစ်သော သရုပ်ဆောင်မင်းသားနေမင်း၊ Model ဇွန်သံစဉ်နှင့် ဒါရိုက်တာကိုပေါက်တို့၏ ဖေ့စ်ဘုတ်အကောင့်များကို သိမ်းယူထားပြီး နောက်ထပ် Celebrity အချို့၏အကောင့်များကို ဆက်လက်သိမ်းယူသွားမည်ဆိုသော Nine Myanmar Celebrity (9MC) Hacker အဖွဲ့အား News Watch မှ ဆက်သွယ်မေးမြန်းထားသည်။

မင်းသား၊ မင်းသမီး Group Chat မှာပါတဲ့ အကောင့်ဘယ်နှခုကို သိမ်းထားလဲခင်ဗျ။ နောက်ထပ်ရောသိမ်းဖို့ အစီအစဉ်ရှိလား။

သုံးအကောင့်လောက်တော့ရှိပါပြီ။ နောက်ထပ် အစီအစဉ်ကတော့ စောင့်ကြည့်ရဦးမှာပါ။

နာမည်လေးတွေ ပြောပြလို့ရမလားခင်ဗျ။

Ko Aung Min Naing, Ko Nay Min, Zun Than Sin,

သရုပ်ဆောင် နေမင်းကိုလည်း မီဒီယာတခု  တောင်းပန်ဖို့ ပြောထားတယ်နော်။ သူ့အနေနဲ့ မတောင်းပန်ဘူး ဆိုရင်ရော။

မတောင်းပန်ဘူးဆိုတာ မရှိပါဘူး။ နေမင်းကိုယ်တိုင်လည်း Page မှာ လာရောက်ဆက်သွယ်ပြီး ၀န်ခံခဲ့ပါတယ်။

သရုပ်ဆောင်နေမင်းကတော့ တောင်းပန်မယ်လို့ပြောလာပြီဆိုတော့ အခြားသူတွေကရော တောင်းပန်ဖို့ ပြောလာပြီလား။ တောင်းပန်ခဲ့ရင်ရော အကောင့်ကို ဘယ်လိုပုံစံနဲ့ ပြန်ပေးမှာလဲဗျ။

တခြားသူတွေအနေနဲ့တော့ မလာသေးပါဘူး။ ဟုတ်ကဲ့ ကျွန်တော်တို့အနေနဲ့ ဆုံးဖြတ်ဆဲကာလပါဗျ။ နေမင်းက မတ်လ ၂၈ ရက်ကတည်းက လာရောက်တောင်းပန်ထားတာပါ ခင်ဗျ။

အချို့မှားယွင်းထိန်းသိမ်းမိတဲ့ Celebrity ဖေ့စ်ဘုတ်အကောင့်တွေကိုရော ဘယ်လိုပြန်လုပ်ပေးမလဲခင်ဗျ။

သူတို့ရဲ့အကောင့်တွေကို မကြာခင် အကုန်ပြန်ပေးသွားမှာပါ။

အဲဒီလို မှားယွင်းထိန်းသိမ်းမိတဲ့အကောင့် ဘယ်နှခုရှိလဲခင်ဗျ။ ဘယ်အချိန် ပြန်ပေးမလဲ။

လောလောဆယ်တော့ လမင်းကဗျာ အကောင့်ပဲရှိပါသေးတယ်။ ဘယ်အချိန် ပြန်ပေးမလဲဆိုတာက အချိန်တခုပြန်ရောက်တာနဲ့ ပြန်ပေးသွားမှာပါ။ လမင်းကဗျာအကောင့်ကို မှားထိန်းထားမိတဲ့အတွက်လည်း စိတ်မကောင်းပါဘူး။ သူ့အကောင့်ကို မကြာခင် ပြန်ပေးအပ်သွားမှာပါ။

9MC အနေနဲ့ Celebrity တွေအပေါ်မှာ သဘောထားရပ်တည်ချက်က ဘယ်လိုရှိလဲ။ Celebrity Accountတွေကိုပဲ ဖောက်တာလား။ အခြား ဥပမာ- လူမျိုးရေး၊ ဘာသာရေးသွေးထိုးလှုံ့ဆော်တဲ့ အကောင့်တွေကိုရော သိမ်းယူပစ်ဖို့ အစီအစဉ်ရှိလား။

ကျွန်တော်တို့ 9MC အဖွဲ့ဟာ သီးခြားရပ်တည်မယ့်အဖွဲ့ဖြစ်တယ်။ အခြားဘယ်အဖွဲ့အစည်းနဲ့မှ ပတ်သက်မှု၊ ပတ်သက်ခြင်းမရှိပါဘူး။ 9MC က Celebrity တွေကိုပဲ ထိန်းပေးသွားမှာပါ။

ဟုတ်ကဲ့ ဒါဆို Celebrity တွေကိုပဲ ပစ်မှတ်ထားတဲ့သဘောပေါ့နော်။

ဟုတ်ပါတယ်ဗျ၊ အဓိကပစ်မှတ်ကတော့  Group Cele တွေကို ပစ်မှတ်ထားသွားမှာပါ ခင်ဗျ။

9MC က ဘယ်နိုင်ငံအခြေစိုက်ပြီး အဖွဲ့ဝင် ဘယ်နှဦးပါဝင်သလဲ၊ ပြီးတော့ 9MC က လူငယ်တွေလား၊ လူကြီးတွေလား၊ ဖြေလို့ရရင် ဖြေပေးပါ။

နိုင်ငံအခြေစိုက်ကတော့ လျှို့ဝှက်မို့လို့ ပြောလို့မရပါဘူး။ 9MC က လူငယ်ပိုင်းကပါ။ ဘယ်အဖွဲ့အစည်းမှာမှ ပါဝင်ပတ်သက်ခဲ့ခြင်းမရှိသော လူငယ်တွေနဲ့သာ ဖွဲ့စည်းထားတာပါ။

ဟုတ်ကဲ့ အဖွဲ့ဝင်ဘယ်နှဦး ပါပါသလဲခင်ဗျ။

ဒါကတော့ ကျွန်တော်တိုမပြောနိုင်ပါဘူးဗျ။

9MC ကို ဘယ်အချိန်လောက်ကစပြီး ဖွဲ့စည်းခဲ့တာလဲ။ မင်းသား၊ မင်းသမီးတွေ  Group Chat မှာပါတဲ့ သူတွေအားလုံးရဲ့အကောင့်တွေကို ထိန်းသိမ်းသွားမှာလား။

ဖွဲ့စည်းထားတာတော့ ကြာပါပြီ။ Public ချပြပြီးရောက်လာတာတော့ မကြာသေးပါဘူး။ အားလုံး မဟုတ်တောင် အချို့အကောင့်တွေကို ဆက်လက်ထိန်းသိမ်းဦးမှာပါ။

မြန်မာပြည်က Celebrity တွေကို ဘယ်လို ပုံစံမျိုးဖြစ်စေချင်လဲ၊ 9MC အနေနဲ့ သူတို့အပေါ် သဘောထားလေး သိပါရစေ။

ဟုတ်ကဲ့။ အားလုံးချစ်ချစ်ခင်ခင်နဲ့ အဆင်ပြေနေရင် ကောင်းပါတယ်ဗျ။ 9MC အနေနဲ့ Celebrity တွေ အားလုံးကိုချစ်ပါတယ်။

အချို့သရုပ်ဆောင်တွေရဲ့ အဖော်အချွတ်ကိစ္စတွေကိုရော ဘယ်လိုမြင်လဲဗျ။

ဟုတ်ကဲ့။ အဲဒါတွေကသူတို့ Privacy တွေပါ။ အဲဒါတွေနဲ့ပတ်သက်ပြီး (9MC က သိမ်းလိုက်တဲ့) အကောင့်တွေမှာပါခဲ့ရင်တောင် အပြင်ကို ဖွင့်ဟချပြသွားမှာ မဟုတ်ပါဘူး။

9MC က အခုလို ဖေ့စ်ဘုတ်အကောင့်တွေကို ထိန်းသိမ်းတဲ့အခါမှာ ဖေ့စ်ဘုတ်သုံးစွဲသူတွေအနေနဲ့ ထိတ်လန့်ကြတယ်။ မလုံမခြုံဖြစ်နေကြတယ်။ အဲဒီအတွက် ဖေ့စ်ဘုတ်လုံခြုံရေး အခြားဆိုက်ဘာ လုံခြုံရေး အကြံဥာဏ်လေးပေးပါဦး။

No System is Safe. အလုံးစုံ လုံခြုံတယ်ဆိုတဲ့စနစ် မရှိပါဘူး။ Social Network တခုဖြစ်တဲ့အတွက် ချို့ယွင်းချက်ဆိုတာ ရှိနေမှာပါ။

ပေါကားလို့ပြောတဲ့သူတွေကို ဂရုမစိုက်ဘူးဆို တဲ့ မင်းသမီးရဲ့ ဖေ့စ်ဘုတ်ကိုရော ဖောက်ဦးမှာလား။

အတိုင်းအတာတခုအထိ စောင့်ကြည့်နေမှာပါ။

ဟိုတခေါက်က ဘင်္ဂလားဒေ့ရ်ှတို့၊ တူရကီတို့နဲ့ဖြစ်တဲ့ ဟက်ကာတိုက်ပွဲတွေမှာ 9MC က ပါဝင်ပတ် သက်ခဲ့တာရှိလား။

မရှိပါဘူးဗျ။

အကယ်၍နိုင်ငံတော်လုံခြုံရေးအတွက် 9MC ကို အကူအညီတောင်းခဲ့မယ်ဆိုရင်ကော။

ဟုတ်ကဲ့ အကူအညီတောင်းခဲ့ရင်တော့ ကူညီပေးအပ်သွားမှာပါ။

ဇဏ်ခီမောင်နှံနဲ့ 9MC ဆက်နွှယ်မှုရှိလား။

ဆက်နွှယ်မှုမရှိပါဘူး၊ အပြင်မှာလည်း မမြင်ဖူးဘူး။ ခုလိုလုပ်ဖြစ်ခဲ့ကြတာလည်း ကိုယ်လုပ်နိုင်မယ့်အရာ ချပြနိုင်မယ့်အရာဖြစ်လို့ ချပြခဲ့တာပါ။

ကျော်ဝဏ္ဏ
News Watch

Be the first to comment

Leave a Reply

Your email address will not be published.


*